1699 год
Се убо ныне о сем блаженнем светлый учитель славный Павел вопиет: «Ихже житие на небесех есть». Наслаждаяся чувством безвещным ненасытнаго и невидимаго добротою видев аки разум на разум точию радуйся достойная потов наше есть удовлити слово сказания: прием подаяние трудов и ныне и присно с теми сый, ихже нога на правоте. Но обаче уне от трудовных тех потов еще есть удобрити слово, сказующе пресветлое и небесное житие о сем блаженнем яко дана Вышнем известно откуду сей таковый светильник возсия; едали от Иерусалима или от Сиона: ни реченна, но в наших родех просия таковый светильник. Сего ради и подвигохся на рвение сами себе приведосте. Но первое убо помышляющу неправедно могуща пользу слышащим сотворити сие молчанием потаити, но да не и мы впадем во осуждение онаго раба скрывшаго в земли талант. Сего ради и аз от преслушания смерти убояхся, всячески писати попекохся елика постигнути иже о нем труды его и хождения еже научен от отец моих, иже слышали от ученик его, много живша со святым, глаголемых же Савватий и другий Симеон, иже видели святаго труд и како трудися. И паки свидетельствующим самим чудесем от гроба святаго: и какоже своима очима видехом бывающая чудеса, удивися, и помощи Божия прося. И на молитвы святаго надеяхся дерзнух писати, елика слышах чудеса святаго, яко да незабвенно будет житие преподобнаго Александра еже обрете истиннаго и немятежнаго пути шествия рекше по Божественному Писанию окормити житие свое, рече бо Господь: «Любяй Мя в законе Моем поучится день и нощь». Блажен человек иже обрящет премудрость. Сему же пути начало святых отец учение. Тому же буди и … Дух Святый научивый прописати душеполезная поучения святых отец. Испытан те рече Господь в Писании: «яко в тех имате обрести жизнь вечную, в них же сокровен Сын Божий, истинная мудрость Слово Отчее, его же обрящет блажен будет». Аз же глаголю: «Уясни ми язык Спасе мой, и расшири уста моя на враги моя, и наполни я, даждь ми глаголати подобная иже мне творити полезная по неизглаголанному Твоему милосердию, подав словесну корму на послужение сицевому полезному, благонравии совершеннем Житии преподобнаго отца нашего Александра». Но приимем добромыслием начало повести сея божественнаго и …, и правдиваго его Жития постиническаго и хождения зело взыскахом и трудихомся о рождении детскаго возраста не могохом обрести, понеже в хабытие прииде, но токмо изыскахом от многа мало постническаго жития сего елика слышахом иже ученицы его поведаша. Молю же вы овие священный соборе, и и христоименитое и Богом избранное совокупление, молите за мя и за мою худость яко понудисте мене недостойнаго и невежду, ум имуща страстен и нечист, изгаголати же невозможно житие преподобнаго отца нашего Александра: но обаче Бога в помощь с молитвами Его призовем. Сам бо Господь рече: Призовите Мя и услышу вас. Всяк бо просяй приемлет». Господь Сам рекл есть Своим учеником такожде и ко всем верующим в него: «Яко без Мене не можете творити ничесоже». Господи Господи аз начал о Тебе Самом о Христе Иисусе Господе нашем
О пострижении святаго Александра, и прихождении на Кушту
Прииде в Каменной монастырь ко игумену Дионисию юноша именем Алексий. От града нарицаемаго Вологды моляся игумену Дионисию одеяти его в монашеский образ. Игумен же Дионисий не презрев моления его, проуведев яко хощет быти сосуд Святаго Духа, одевает его в монашеский образ: и нарече имя ему Александр, и даде его духовному старцу и благоговейну сущу. Он же многа лета пожив в послушании велицем. В нощи без сна пребываше на молитве, а в день без покоя служа на братию. Помысел же его нача из млада боятися Бога, славы же бежа, от человек, изыде от Спаса Каменнаго, и обхождаше места многа ища покоя иде же обрести место работати Богу. Последи же прииде яко Богом наставляем в весь, зовому Сянжему, иже и до ныне это Евфимиев монастырь. Округ же того места блата идеже дебри непроходимо …:и возлюби преподобный Александр место, и не бяше тогда церкви на том месте. И сотвори молитву, и созда себе келеицу малу, в ней же своими молитвами трудолебными Богу моляся, и Пречистой Его Матери. Та же святый Александр нача помышляти, понеже ненавидя славы от человек вменяше то грех быти и стыд. Попечение же имы еже бежати славы от человек, работати помышляше Богу в пустыни. Всевидящее же Око видев труды его яко хощет сосуд быти Святаго духа, и мощен управити Христова стада, вниде сему в помысел отыти от туду, понеже яко тамо имать быти не в пустынное место, поиде оттуду преподобный Александр: занеже тамо христиане близ: слышал бо святаго мужа Евфимия вдале оттуду яко осьм десять и пять поприщ в нощней стране, близ езера глаголемаго Кубенскаго, на восточную страну солнечнаго восхода два порища: на реце, зовома Кушта. И округ же того места блата и дебри, и непроходимая места, где предреченный Евфимий созда келеицу малу, в ней же покой приимаше от труда. Прииде же преподобный отец наш Александр ко преподобному Евфимию. Срете же его преподобный Евфимий радостен бысть, и приим его радуяся яко от Бога посланна, яко же рещи: Оба едину волю иместа духовною работою подвизающася. Изволи преподобный отец наш Александр место на устроение пустынное, и поведа помышление свое преподобному Евфимию, яко хощу Богу работати на месте сем. Слышав же преподобный Евфимий, радостен быв. По времени же мале о духовном беседовав. Видев же преподобный Евфимий преподобнаго Александра яко делатель есть Христовых заповедей, и даде ему келию, иже сам созда своима рукама, и благослови его животворящим крестом на свое место, и сам благословение получив преподобный Евфимий от преподобнаго Александра, отыде в предреченную пустынь на Сянжему, иже преподобный Александр зача место то. И прииде тамо преподобный Евфимий, и возлюби место то, и созда церковь во имя Пресвятыя Владычицы нашея Богородицы и Приснодевы Марии, честнаго Ея Покрова, велику и прекрасну, и украси ея иконами и книгами чудне: и поживе преподобный Евфимий лета довольна с миром почи о Господе. Предреченный же преподобный отец наш Александр моляся в пустыни, иже даде ему святый Евфимий, по Божию строению постави крест, иже ношаше с собою и преклонь колени моляся.
Молитва
Господи Иисусе Христе Сыне Бога Живаго, Упование всех концей земли, призри се ныне и виждь место сие. И благослови его и мене недостойнаго раба Твоего удостой в настоящем сем месте, молитвами Пречистыя Твоя Матере, честаного и славнаго Ея Успения, создати на сем месте церковь. Но яко же Тебе Христе изволившу наш убо разум несовершен есть, и всякаго неведения исполнен. Но Сам Господи направи мя, от Тебе возможна суть. И Ты о все милостивая Госпожа Мати Христа Бога Владычице Богородице услышим я недостойнаго раба Твоего, се ныне прибегаю в теплое заступление и покров, требующа твоея помощи, на Тебе упова душа моя, на Сама мя настави, и сохрани мя от уст всепагубнаго зимя, знающаго и ищущаго поглотити. Сохрани Владычице сохрани хотящих на месте сем работати Богу, и молитвы возсылати о благоверном царе, и о всех христолюбивых князех, и за вся православныя христианы, о спасении и утверждении спасения их и укрепления покой нам бывает и беспечалие, такожде тихо и безмятежно житие имамы жити со всякою верою благою: Бог бо вся человек хотя спасти и в разум истины приити.
И восстав от молитвы, рек: аминь.
И постави себе келеицу малу иную, и нача жити в них, в трудех со слезами Бога моля. Преподобный же отец наш Александр подвизся постом и бдением, и жаждою тело свое изнуряя, и многи пакости от бесов терпя, землю копая мотыкою на потребу, и ярое жито сея: пища же ему сухоядение покуду, и пия воду. Прежде един Богу моляся по времени же некоем прииде к нему некий старец: видев же его преподобный радостен бысть, и прият его яко от Бога посланна, и молит его пребывати с ним. Старец же видев святаго тщание, и усердие к нему, пребысть на том месте пять лет со единем. Посем же и другаго брата име. Преподобный же моляшеся Богу и Пречистой Его Богоматери, и ста на молитве, и рече:
Братие, помышлающу ми во уме своем на Бога возлагая, аще будет Богу угодно, и Пречистой Его Матери, сие может на дело произвести, хощу на сем месте пустынном церковь создати. Они же реша ему: Честный отче, воля господня да будет, яко на сем месте прославитися Имени Его Святому, и Пречистей Его Матери от ныне и до века.
О поставлении церкви Пречистыя Богородицы
Иде преподобный отец Александр ко епископу Дионисию града ростова: и благословение прият от него. Епископ же Дионисий благослови его, и духовно поучив, душеполезная словеса беседова к нему, и рече ему: о Святем Дусе, возлюбленному сыну, и сослужебнику нашего смирения Александру мир и благословение буди с вами во веки, аминь. И дал ему вся потребная на устроение пустынное. Александре же прием благословение и отыде. По Божию строению созда церковь во имя Пресвятыя Богородицы Честанго Ея Успения благословением епископа Дионисия града Ростова, и освяти олтарь.
О князе Димитрии на устье реки Кубеницы
В те же времена владяше в Заозерии отчиною вокруг езера великаго Кубенскаго князь Димитрий, и князь Симион Ярославския князи. Слышав же христолюбивый князь Димитрий, возрадовася сердцем яко близ его державства хощет Бог обитель воздвигнути. Тогда даде ему потребная на созидание обители. По времени же некоем княгиня его Мария нача веру велию имети ко Пречистей, и ко преподобному посылаше ово пития, ово ядения, и он кормяше маломощных. И нача преподобный подвизатися постом и жаждею, отсюду же велик познавашеся братии, и поучаше их на доброе делание. Весте ли любимицы мои подобает нам многими скорбьми внити в Царство Небесное. Нужно бо есть Царствие Небесное, и нужницы восхищают е. Святый же Александр бнспрестанно Богу моляшеся.
По времени же некоем князь Димитрий Ярославский иде на супостаты воевати. В та же времена приидоша татарове мнози, и села его та близ суща монастыря святаго повоеваша, и на устьи реки Кубеницы, в то же время загнашася пять татаринов в пустынь к преподобному. И срете их преподобный, и осени их животворящим крестом. Они же падоша на землю аки мертвии на мног час. О девятом же часе помолися преподобный Господу Богу и возбуди их. Во имя Отца, и Сына, и Святаго Духа, восстаните. Они же восташа и поидоша путем своим, славяще и хваляще милость святаго.
По преставлении же князя Димитрия княгиня его Мария прииде на поклонение ко Пречистой и к преподобному благословения ради, и узре преподобнагов церкви молящася и поюща псалмы Давидовы сто пятьдесят псалмов, и не благословися у святаго, но зря его втай среди церкви обнажена до персей, ядяху святаго комары, и узре преподобный озлобися на ню, занеже пресече ему молитву и изглагола к ней: О княгине, не подобает ти странничества нашего смотрити, занеже нищи есмы и странни; княгиня же, позна свое согрешение, и моляся прощение получити от святаго умален же быти преподобный и прости ея, и повеле ей нищету свою кормити в дому своем, княгиня же обещася и благословение получи и поиде в дом свой радуяся, и славя Бога. Потом же прииде нань скорбь, и посылает к святому с молением помолити за ню Бога. И не презре преподобный моления ея, помолися о ней Господу Богу и Пречистой Его Богоматери, и проуведе от Бога о смерти ея святый за двадесять дний.
По лете же некоем народися пшеницы много, делатели же на гумне изгребоша в груду пшеницу и поидоша почивати. И некто поселянин бяше и невежда прииде на гумно ко пшенице, и абие нагреб мешек пшеницы, и не може подняти. И уведев же преподобный и прииде, и глагола ему: Почто чадо не по силе взял еси. Поселянин же паде, не возмог глаголати. И повеле святый усыпати, и еще не може, и еще усыпати повеле, и не може подняти. И мало остася. Преподобный отец Александр прости его о бывшей вине, и наказа его потом таковая не творити и взя человек мешец легко подня, неслыша тяготы. И заклятися к преподобному и иде в дом свой благодаря Бога и преподобнаго Александра.
Святый же во глубокую старость прииде, нача изнемогати: имея же два брата тогда прежде помянутая Савватия и Симеона, глагола им: Братие, колико вам благоволит Бог терпети на сем месте имейте любовь между собою, друг друга любите яко сами себе: Бог бо вам помощник, и прибежище и сила и стена от сетей вражиих: наипаче же братие смирением украшайтеся и чистотою. Страннолюбия не забывайте: пищу же, и питие имейте немятежно, и стяжите любовь нелицемерну, и чистоту душевнуювкупе и телесную. Огнем такая нечистота братие умрет и огнем потребится. И ни во чтоже вменяйте жития сего честь и славу, но вместо еже от Бога ожидати мздовоздаяния небесных и вечных благ наслаждения. Сия слышаще братия, очеса слез исполнивше, и глаголюще: О духовный отче, сам отходиши в вечный покой, а нас оставляеши в скорбех и страстех. И кому ныне оставляеши пещися душами нашими; преподобный же отец наш Александр с кротостию отвеща им глаголя: Господу Богу, и Пречистей Его Матери, и святому Николаю Чудотворцу; составите церковь во имя святаго николая Чудотворца, и место знамена, идеже ныне стоит, и рече: аще Бог подарует вам терпение, попецытеся, и мир Божий да будет с вами, просвещая вас и вразумляя, и на путь истинный наставляя. Аз братие подаю вам мир и благословение, токмо будите послушливи по Господню слову реченному ко Апостолом: «Слушая вас, Мене слушает. Отметаяйся вас, мене отметается. Отметаяйжеся Мене, отметается Пославшего Мя». Убоимся братие сего страшнаго онаго гласа глаголющего: отыдите от мене проклятии и клятвопреступницы, и братоненавистницы. Се же чада глаголах вам разум подати ко истине, и во всяком совершении быти, и светом Божественным, и живоначальныя Троицы осяватися во веки.
Уведе же преподобный свое отхождение к Богу, естества отдати долг: дух же к желаемому Христу предати, в день недельный. И … ко …, службу совершив: Владычняго Тела и Крови Христа Бога нашего причастися. Востав же преподобный отец наш Александр, и воздвиже очи на небо и руце и в перси себя бияше, и сотвори моление Господу Богу, глаголя: Господи Боже мой Владыка Человеколюбче щедрый, приими в вечныя твоя покоища, и не помяни Господи Господи Благий и моего согрешения, елика согреших ведением и неведением, делом и глаголанием, зрением и мысльми, Господи сохрани Христе раб Своих во обители сей изволивших работати Тебе господу, искушения сопротивнаго разруши Всесильне Господи, все льстиваго врага сии … раб Твоих отжени. Посли Владыко свыше благодать Пресвятаго Твоего Духа, и укрепи их на евидимыя ополчения Господи, да прославится имя Твое святое. И преклонь колени со слезами моляшеся ко Пречистей Богородице: О Всемилостивая Владычице Богородице, ходатаице к Сыну своему и Богу нашему Иисусу Христу. Тебе Сладкаго ми Христа Ходатаице, яко вем спасенному упокоению пристанище, предлагаем раби Твои, буди нам Помощница и Заступление, на Тя уповахом, и на Тебе надеемся: и Тобою хвалимся, о Тебе все упование наше есть, яко сподобила мя еси грешнаго и грубаго раба создати обитель сию, и прославитися имени Твоему Пречистому. Ты и ныне о Владычице призри на обитель сию, и мне, и на живущих во обители сей имене Твоего ради, иже и молитвы приносити о благочестивом царе, и за вся благоверныя князи, и за род христианский о мире, и о здравии и о упокоении душ наших. Рече бо Апостол: Молитеся друг хза друга, да исцелеете И мене грешнаго душу приими с миром. И сотворив молитву, о Христе целование даде братии, и с миром почи о Господе.
Поживе преподобный отец наш Александр шестьдесят восемь лет и два месяца и двадцать три дни. Бысть же видением полне, возрастом средний, а телом сух, излишнше: главу имея среднюю: лице окружено: очими тихи: браду до персей, полна, кругла; власы тморусы, в пол седы.
Преставися преподобный в лето 6947, в восемнадцатый час дни, месяца июня в девятый день. На память иже во святых отца нашего Кирилла, архиепископа Александрийскаго.
Положено бысть тело преподобнаго отца нашего Александра близ церкви Пресвятыя Богородицы, иже сам созда, и повеле положити на полуденной стране олтаря и место назнамену ту. И погребен бысть идеже и до нынешнего дня лежит чудотворное тело его, даже и до ныне от гроба святаго исцеление безмездно приснотекущий источник и, споспешествующим самым чудесам святаго. Болящим целитель: слепии приходяще с верою, просвещаются: глухии слухи приемлют: немии быстроглаголивы бывают: немощнии в силу прелагаются: беснии исцелеваютися, и всякими болезньми одержимии прикасаютися к раце мощей святаго, с верою, здравие приемлют;
О поставлении церкви святаго отца нашего Николая;
По времени же некоем ученицы его по словеси преподобнаго создаша церковь теплую, во имя святаго Николая Чудотворца. И приспе на память преподобнаго освятиша олтарь;
XVIII век
Чудо 1, преподобнаго отца нашего Александра
По лете же некоем явися отрасль над гробом святаго древо зовомо рябина, еже есть и до ныне. Во время же праздника Пречистыя Богородицы, святаго Ея Успения, приидоша от окружных мест соседи на праздник Пречистыя Богородицы, на небрежение детищ прииде и сломи ветвь у святаго того дрва, и отекши рука нача болети велми. И по днех приидоша родители его, именем Матфей, моляся Пречистой, и преподобному ко гробу приложися, и исцеле рука его, и бысть здрава яко и другая, и иде в дом свой благодаря Бога, и славя святаго, и ягодичие от тог древа вземлет на исцеление недугов.
Чудо 2
Понеже искони обаче Бог прославляет святыя своя не токмо живых, но и по преставлении не оставляет Бог своего угодника Александра, еже прославляется Его чудный и по преставлении яко жива суща. … бо тако, приидоша от окружных мест соседи, и приведоша с собою беснаго человека именем Михаила, и нача беситися, и не могоша его держати. И прииде нощь, и связаша его, и положиша в церкви: сами же начаша почивати. И бысть во глубокую нощь возопи смысленно, и глагола: о святый Николае, преподобне Александре чудотворцы, простите мя грешнаго от немощи сея. И стражие его слышаще вопившасмысленно и молящася, приидоша зраще его молящася, и проста стояща: храм же исполнен благоухания видяще, и вопросиша беснаго: како бысь прост: и рече им Михаил: о братие бысть свет: прииде святый Николай Чудотворец, преподобный отец наш Александр из олтаря. Святый Николай нача кадити церковь и мене: преподобный Александр прекрести мене, аз же ужасохся, глаголати не могох. И преподобный Алекандр глагола ми: Михаиле востани, и моляся святому Николаю, и мене в помощь призывал, и будеши здрав: и абие невидим бысть. И аще став прост и смыслен и слушав пение у святаго, и иде в дом свой, славя и благодаря Бога, и Пречистую Его Матерь, и святых чудотворцев: святителя Николая и преподобнаго Александра.
О пожаре
Не по мнозех летех грех ради наших Божиим попущением бысть пожар велик зело, в лета 7027 в нощи, на память святаго великомученика Димитрия Селунскаго, храм Пречистыя Богородицы и над гробом Александра Чудотворца, Николая Чудотворца, и весь монастырь погорел: при игумене Нафанаиле. По пожаре же созда церковь Богородицы Честнаго Ея Успения. И над гробом преподобнаго, и чудотворца Николая и все устроиша по чину монастырскому.
Чудо 3
Веси некия зовомыя Пельшы привезоша человека, именем Косму, в расслаблении суща, немощна велми, рукама и ногама невладеюща. И начаша молебен пети: он же плачася вопия: Господи помилуй мая грешнаго, и егда начаша Евангелие чести: он же рукою креститися возмогий. И егда начаша Достойно пети, он же воста на нозе, и ко гробу святаго приложися: и пребысть ту две нощи, и бысть здрав, и иде в дом свой славя и благодаря Бога, и преподобнаго чудотворца Александра.
Чудо 4, о беснующемся
Приведоша некоего человека, близ монастыря жилище имея, именем Зиновий, бесом мучим люте, и приложися ко гробу преподобнаго Александра, и абие исцеление получи, и бысть здрав помощию Владычицы нашея Богородицы: и молитвами святаго Александра. Той же Зиновий веру приложив от всего сердца своего к монастырю блаженнаго Александра, от имения своего даде в монастырь, и отыде в дом свойславя Бога, и Пречистую Его Матерь, и великаго чудотворца Александра.
Чудо 5
По сем же приведоша некоего человека от окружных мест, именем Мануйла, бесом мучим велми, связан ужема железными по руку и ногу, едва от многих держим бываше: гласы бо нелепыя испущаше: рыкаше яко лев: лаяше яко пес: устремляшеся на человеки яко зверь. И тако всем странен позор бяше: понеже буяху его яко злодея да умолчит. Елико они бивше его еже умолчати: толико же он множае неистовляяся вопияше, и злыя глаголы испущаше, и всех страхование держаше: таже помощию Божиею нача кротети, и в мале преста от беснования своего. И ведоша го в гостиницу, и положиша на него железа тяжка, на руце и на нозе: не смеяху его проста пустьити: занеже бо нощь приближися, сми стражие утомишася, и сном одержими бяху. И в ту нощь явися ему святый Александр, и глагола ему Мануиле: Господине святый преподобне Александре помилуй мя: занеже Господине люте стражду от бесов мучим. Глагола ему святый Поиди человече и молися Богу и Пречистей Его Богоматери, и мне на помощь призывай. И да есть у тебе в дому седло монастырское, и ты его отдай в дом мой: понеже то седло украдено бысть в пустыни, и бысть человек прост, и падоша ужа железная с него, и воста из гостиницы и иде ко гробнице преподобнаго Александра помолитися. Восташа же стражие его не обретоша в гостинице, но токмо обретоша я же на нем железа быша и … его утопша, или удавишася, и начаша искати по всему монастырю и обретоша его у гроба преподобнаго Александра молящася и плачущася и сказа стражем како явися ему в нощи чудотворец Александр, и како прости его, и избави от бесовских недуг, и како железа спадоша с него, и удивишася людие о преславных чудесех его. Сие же чудо видяще, вси прославиша Бога, и Пречистую Его Матерь, и блаженнаго Александра. Глаголюще: Воистину дивен Бог во святых своих. Человек же той отыде в дом свой радуяся.
Чудо 6. О бесном человеце Никите именем
Ниже ине да не умолчано будетчудо, бывшее Александром блаженным, иже прежде мала сего времени бывше человек некий именем Никита, от мнастыря живяше вдале два поприща: и попущением Божиим сей человек бесом позавиден быв ума иступив, и некия странныя гласы испущав, неточию много глаголати про честных человеческих мудрований оставлен быв, яко видевше его людие пленена, и о благих пленена на горшая, попущением Божиим, в тех зле страждуща, и поведоша сего в монастырь идеже блаженный преподобный Алекесандр чудотворец лежаше. И приведену ему бывшу такожде нача беситися, и не к сея словеса странна и гнусна глаголати, иже нелепо есть писанию предати, или поведати. И тако сему бывшу, и егда приведоша ко гробу блаженнаго Александра, прииде человек той в чувство, и исцеление получи, и бысть здав якоже и прежде благодатию Христовою, и помощию Владычицы нашея Богородицы, и молитвами преподобнаго Александра, отыде в дом свой здрав славу Богу воздая, и святому Александру, тем же видевше его пленена, и мнози знаема прежде видяху его страждуща, такожде и … иступающа: последиже того здрава и целомудренавидях, и вси единодушно прославлях Божие величие, и блаженнаго отца нашего Александра.
Чудо 7 святаго, о бесном человеце
Многаже и ина изрядная чудеса блаженнаго чудотворца быша от раки, и истекает даже до сего дни: неточию егда бяше, во время жизни своея, но и по преставлении его, ова явлена, ина же неявлена: к Богу же вся ведущу, иже и писанию не предана быша множества ради бываемых чудес.Сие точию мало отчасти чудес блаженнаго писаша, да уведят вси христоименитиии народи яко Господь Иисус Христос прославляющих его прославляет. Человек некий именем Петр близ монастыря из Закуштия, той лете мучим, связану ему бывшу, на многи дни. Зле стражда: и многими человеки приведен бысть в монастырь святаго чудотворца Александра ко гробу приложися, от того часа исцеление получи, и бысть здрав и избавлен бысть от лукавых бесов, и прослави Бога, и Пречистую Его Матерь. И преподобнаго Александра, иде в дом славящи величие Божие, и чудеса преславная.
Чудо 8
Человек некий именем Феодор, веси некия глаголемыя Березника, от монастыря за 8 попроищ. Сему же жена именем Наталия, мучена бысть бесом много: и приведена бысть в монастырь святаго, и к целебному гробу чудотворца Александра приложися, и бысть здрава, и иде в дом свой славя Бога, и Пречистую Его Богоматерь, и святаго чудотворца Александра.
Чудо 9
Из веси глаголемыя села Заднего Горы Лисии: от монастыря за 17: поприщ человек некий именем Михаил бысть в расслаблении многа лета. Родителие же его слышаше многая бывающая чудеса святаго и преподобнаго, великаго чудотворца Александра, вземше расслаюленнаго, и везоша его в монастырь преподобнаго и сему же расслабленному привезену бывшу в монастырь святаго чудотворца Александра, и егда приложиша , в той час бысть здрав, и иде в дом свой, славя и благодаря Бога, и Пречистую Его Богоматерь, и великаго чудотворца Александра, и поспешника в чудесех чудотворца Николая, проповедуя чудеса повсюду.
Чудо 10 о бесном человеце
Ина преславная написати братие: яже чудеса святаго бывшая. Из веси глаголемыя Томаши, от монастыря 40 поприщ. Человек некий именем Матфея, мучим бесом много. Бывшу же ему ведену двема человекома в монастырь преподобнаго чудотворца Александра, и недошедшу ему в монастырь святаго, и бысть бесный человек здрав на пути, и много моляся к цельбоносному гробу преподобнаго чудотворцову приложися, и иде в дом свой радуяся, и славя Бога, и Пречистую Его Богоматерь: и святага чудотворца Александра.
Чудо 11 святаго о беснующемся
Приведоша некогда от веси глаголемыя Богтюги от окружных мест от монастыря за 10 поприщ человека именем Григория, бесом мучима, и велми связан ужема железныма по руку и по ногу; едва от многих удержим бываше. Рыкающего яко лев, и лаяше яко пес, и устремляшеся на человек яко зверь. Темже страхование всех одержаше, и нача иерей молебен пети. Тажн помощию Божиею нача тишати и еротети. Егда начат священник Евангелие чести, и преста от беснования свего. Таже егда начаша Достойно пети: он же перекрестися, и ко гробу святаго приложися, и бысть здрав, и иде в дом свой радуяся, славя Бога и Пречистую Его Матерь и великаго чудотворца Александра.
Чудо 12
Человек некий именем Галактион, из веси глаголемыя Устья реки Кубеницы: от монастыря за 3 поприща зело мучим на все ночи и дни. И не даяше к себе приближитися, суров бо и неистов являшеся, и едва возмогоша его привести в монастырь святаго, и ко гробу преподобнаго чудотворца Александра, и пребысть в монастыре 2 дни. И наченшу молебен пети, и чтену бывшу Евангелие, и по том часе нача бесный тишати и кротети от беснования своего, и ко многоцелебному гробу приложися святаго, преподобнаго отца нашего Александра и бысть здрав в том часе бесный, нача хвалу воздавати Господу Богу Пречистой Его Матери, и преподобному чудотворцу Александру.
Чудо 13. О жене очима исцелевшей
Обаче и сих чудес действие да не умолкнем. Некий человек именем Иоанн, от веси нарицаемыя Троецкия Трети. Жена же его именем Анастасия. Сия же очима тяжко боляше два лета. Приведена же бывши к цельбоносному гробу преподобнаго Александра, и и молебная сотвориши. Жене же приложишеся ко святому его гробу, и бысть здрава очима, и иде вдом свой славя Бога и святаго Его угодника, и чудотворца Александра.
Чудо 14, о жене исцелевшей
Человек некий именем Григорий, жилище имея вдале от монастыря за 7 поприщ, и много мучим бысть зело бесовом. И приведену ему бывшу в монастырь, и ко гробу святаго чудотворца Александра приложися и бысть здрав, иде в дом свой радуяся, и славя Бога, и Пречистую Его Богоматерь, и скораго заступника великаго Николая Чудотворца, и преподобнаго отца нашего Александра, дающаго с верою припадающим к нему многа исцеления приемлют от святаго.
Чудо 15. О бесном человеце
Подобаше убо похваляему святому … наряду изнести, некий человек именем Венедикт, из веси глаголемыя Лагиревы. Той же мучим от бесов, и приведен бысть в монастырь святаго, и приложися ко гробу преподобнаго чудотворца Александра: и бысть здрав, иде в дом свой радуяся, и славящи Бога, и святаго угодника и чудотворца Александра, творящаго предивные чудеса.
Чудо 16. О детище.
Человек некий именем Иакинф, имея дщерь именем Марию. Семуже детищу много от бесов мучиме. Родители же ея приидоша в монастырь, и ко гробу святаго чудотворца Александра приложиша ю, и абие в той час здрава бысть. Родители же ея ведоша детища в дом свой радующеся, славяще Бога, и угодника Его и чудотворца Александра.
Чудо 17 святаго о жене
Ин некий человек, именем Георгий, от веси глаголемыя Корнския. Его же жена именем Фекла, много лет страждущи от бесов, и приведенне ей бывши в монастырь святаго преподобнаго чуотворца Александра: и ко гробу приложися святаго и и сцеление получи: и бысть здрава, и иде в дом свой рядуяся, и славословя Бога, и Пречистую Его Богоматерь, и великаго чудотворца Александра.
Чудо 18, о муже исцелевшем
Человек некий именем Григорий, жилище имея вдале от монастыря за 7 поприщ, и много мучим бысть зело от бесов. И приведену ему бывшу в монастырь, и ко гробу святаго чудотворца Александра приложися, и бысть здрав, иде в дом свой радуяся, и славя Бога, и Его Пречистую Богоматерь, и скораго заступника великаго Николая Чудотворца, и преподобнаго отца нашего Александра, дающаго с верою припадающим к нему многа исцеления приемлют от святаго.
Чудо 19. О расслабленном
В лето 6085: при державе в православии изрядна сиятельнаго царя нашего великаго князя Иоанна Васильевича Московскаго, и всея России. И при благоверных сынех его царевичах, князе Иоанне Иоанновиче, и князе Феодоре Иоанновиче. Человек некий именем Игнатий, от веси нарицаемыя из Закуштия, от монастыря 2 поприща. Раслаблен бе руками и ногами, и всеми уды тела его, и принесену ему в монастырь святаго и молебно приложися к чудотворному гробу, и благодатию Божиею получи исцеление, и бысть здрав, якоже и прежде, и поиде в дом свой радуяся, славящи Имя Бога и всех Господа нашего иисуса Христа. И пречистую Его Матерь. И угодника их преподобнаго чудотворца Александра.
Чудо 20. О хромце
В лета 6181 е: месяца декемврия, в 30 день, ин человек от иныя веси, из Орлова. Отстоитжен от обители преподобнаго 12 поприщ. Той же человек, именем Дометий расслабе ногами, и тако у гроба святаго угодника Христова молящуся ему, и по обычне молитве священнической, ногами бысть здрав. И изыде от обители преподобнаго в выше писанную весь Орлово, радуяся и славя и благодаря Бога и Пресвятую Богородицу, и преподобнаго чудотворца Александра, егоже молитвами Христе Боже помилуй нас: многомилостиве возведи нас от пропасти греховныя, спаси нас молимся прилежно достигнути во пристанище горнего Иерусалима со всеми святыми избранными Твоими. Идеже будет жилище всем верующим во Имя ТвоеГоспода Бога и Спаса нашегоИисуса Христа, и возлюбившим хваление Имя Твое и явление пришествия Твоего.
Слово похвальное преподобнаго отца нашего Александра Куштскаго
Творец наш Христос Бог, и царь дивен во святых своих, иже от века благоугодивших ему: преподобием и правдою служащих и поющих, и славословящих Его со безначальным отцем, и Пресвятым и Благим и Животворящим Его Духом, ныне и всегда и в бесконечня веки. Яко же некий богодухновенный старец повествует: Солнце убо чувственное просвещает и веселитвсю тварь видимую. Житие же и премудрость святых просвещает и веселит души всех человек, хотящих спастися, и в разум истинный приити, промыслом Богоначальныя Троицы. Прародители благовернаго царя государя Иоанна Васильевича всея России самодержец, и великий князь Киевский Владимир: нареченный во святом крещении Василий, уподобися доброму купцу, ищущему добраго бисера. И подобльтствова великому во Апостолех Павлу, высокопрестольной церкви восточной Константина града новаго Рима, и обрете предражайший бисер Всеславнаго Сына Божия Иисуса риста и спаса нашего, и свой народ Киевский и всея России крещением святым просвети, и богоразумия с верою Евангельским, и Апостольским учением, и и Преданием отеческим, и святым Писанием освятил. Мы же народи христианстии Российстии по духу сынове святыя Восточныя церкве, в Росиийском народе, в преименитом и в пресловущем, и христолюбивом в царствующем граде Москве: аще бо и велми грешнии суть, но истинною верою раби есмы велии Христа, истиннаго Бога нашего, и Пречистыя Богоматере, во исповедании и покаянии, помощию Пресвятыя Богородицы крепце надеемся на неизглаголанное благоутробие Единороднаго Сына Ея, Господа нашего Иисуса Христа: понеже не гневается яко человек, и не мстит яко сын человеч, но бесзлобив есть и милостив и кроток и той Очищение от грех наших, издал нам грешным в помощь Пресвятую Богородицу Матерь Свою. Сию ему представляем в моление, и с Нею святыя Силы Бесплотныя, и предтечу Его Крестителя Иоанна, и святых всехвальных Апостол, и пророк, мученик, и святителей, и преподобных и праведных, и всех святых. И святейших святителей новых чудотворцов Киевских и всея России, обаче нам книжным рачителем, к православным читателем подобает сказывати. И сама бо правда являет истину, и понуждает показати правду вслух, всем повсюду православным христианом. О пречестная главо, дом быти благодати Святаго Духа, и Спасово исполнение, со Отцем обиталище, предстоя у престола всех царя: наслаждаяся светом Единосущныя Троицы. Той же ангелы и херувимы песть присвятую возсылающе. Велико и неизследованно дерзновение имый ко Господу Богу нашему Иисусу Христу, и Пречистей Его Матери, и весх святых Его, хадатая и молебника о наших согрешениих. О преподобне отце нашем Александре, молися Всемилостивому Спасу и Владычце нашему, и Господу Богу, еже сохранену быти. Державному государю нашему православному, и еже покорити ему вся сопротивныя видимыя и не видимыя враги под ноги его. И языком же иноплеменных истеребитися. Иже веру православную непорочну сохранити, и утвердити единоверных народа, и всему миру умирену быти, от глада и пагубы избыти. От всех нас бед свободи сими молитвенными твоими испрошении. Старыя утеши; юныя накажи: недоуменны умудри: вдовицы помилуй: сироты заступи: младенцы воспитай: обитель сию сохрани: и спастися стаду твоему, иже во обитьели сей: и от всех напастей соблюди нас. О преподобне отче наш александре, умоли правовернаго судию небеснаго царя Господа Бога и Спаса нашего Иисуса Хритса, иже молитвами твоими в день Страшного Судища избавити нас шуия части, и с десными овцами сподобитися, и услышати оный глас от Влдадыки Христа Бога глаголющ: Приидите благословеннии Отца Моего, наследуйте уготованнгое вам Царствие от сложения мира. Тем все речем: преподобне отче Александре, радуйся пустынножителючестное сокровище благости, радуся отче Александре, слепым прозрение, с верою приходящим. Радуся преподобне, по водам плавающим тихое притсанище. Радуйся преподобне царю нашему на враги победа. Радуся и иноков наставниче и утверждение. Радуся ангелов собеседниче., радуся преподобне в путь ходящим скорое поспешение. Радуся преподобне иже вся человеки от тьмы бесов лукавых избавляеши. Радуся преподобне отче Александре иже с лики святых сподобися предстояти престолу Христову, да избудем всех зол преподобне отче твоими молитвами, славяще Святую Троицу, Отца и сына и Святаго Духа, ныне и присно и во веки веков. Аминь.
Молитва преподобному Александру
О священная главо преподобне отче Александре великий, не забуди нищих твоих до конца. Поминай нас всегда во святых своих и благоприятных молитвах к Богу. Помяни стадо твое еже сам паствил еси. Не забуди посещати чад твоих. Моли за ны отче священный за дети твоя духовныя, и яко имея дерзновение ко Царю Небесному, не премолчи за ны ко Господу, и не презри нас верою и любовию чтущих тя. Поминай нас недостойных у престола Вседержителева, не престай молитися о нас ко Христу Богу. Тебе бо дадеся благодать молитися за ны. Не мним бот я мертва суща. Аще и телом преставися о нас, но и по смерти убо жиыв пребываеши. Но не отступи от нас духом: сохраняя и соблюдая нас от стрел вражиих, и всякия прелести бесовския и козней диавольских, пастырю наш добрый, се бо мощей твоих рака пред очима нашима видима есть всегда, но святая твоя душа с Небесными Силами у Престола Вседержителева стоящи, достойно веселися. Нам бо ведущим тя во истину и по смерти яко живу сущу. Тебе припадаем, и тебе молимся вси, и мили ся деем, еже молитися о насВсесильному Богу о пользе душевной, и испроси время на покаяние: и не возбранно прейти от земли на небо, мытарства горьких бесов воздушных князей, и вечныя муки избавитися, и Небесному Царствию начальником быти, со всеми праведными от века угодившими Господу Богу нашему Иисусу Христу, Ему же подобает всякая слава, честь и поклонение, со безначальным Его Отцем, и Пресвятым и Благоим и Животворящим Твоим Духом: ныне, и присно и во веки веков Аминь.
У вышеписанной … уставом писанной полудестевой книги сначала по листом на нижнем поле писано тако: в 26 день мая 1738 года положил сию книгу Житие Александра Чудотворца со службою в монастырь сего в Вологодском уезде что на реце Куште по вере своей вместо ветхаго Жития и Службы чудотворца Александра Вологодского уезда слободки Петровской крепостных дел бывшей писрь Тихон Иванов сын Хрипунов при игумене Иринархе Морозове онаго Александрова монастыря по родителех своих схимонахе Алексие Екатерине Тихоне и по прочих родителех а сея книги Жития Чудотворнаго со службою и оного Александрова монастыря с Кушты игуменом того Александрова монастыря и братии и бельцам другим никому не отдать и не продать, и не заложить сие писал я Тихон Хрипунов своеручно вышеписанного году и числа.
ГАВО 496-1-1668 Описи имущественного и хозяйственного состояния церквей и монастырей. – 1747, л. 111 – 125